Nylie Sport

Hoërskool Nylstroom sport kook!

Nylies bied ‘n groot verskeidenheid sportsoorte aan wat elke sportentoesias die geleentheid sal gee om op professionele manier aan sport blootgestel te word en tot hul volle potensiaal te ontwikkel.

ATLETIEK

Hoërskool Nylstroom bied in 2020 die Bosveld-interhoër op ons atletiekbane aan. Hierdie kragmeting tussen skole in die Waterberge lewer jaarliks skitterende atletiek op.

Die Nylie-atlete, onder die leiding van ervare afrigters, presteer elke jaar baie goed!

Die afgelope drie jaar het ons verskeie mooi prestasies behaal. Van die hoogtepunte was Tariro Nkosi (o.14-meisies hoogspring) wat eerste was tydens die Top 10 Bestmed-byeenkoms in 2020. Sy het ook gekwalifiseer vir die SA-kampioenskappe. Tariro het natuurlik ons eie rekords aan flarde gelaat.

Danel Niemann, ’n gewigstoot-atleet (o.18-meisies) en naeloper Martin Vosloo (o.17-seuns 100m) het ook gekwalifiseer vir die 2020 SA’s. (Die byeenkoms is weens Covid-19 gekanseleer.)

Vorige jare se atlete was uitblinkers by die SA’s. In 2019 het Keletso Mokgahlane (400m, seuns o.19), Leonette Vosloo (vyfde plek, meisies o.19), Danel Niemann (elfde plek in gewigstoot en diskus meisies o.19) en Martin Vosloo (100m, seuns o.17) aan die byeenkoms deelgeneem.

Die Nylies het geskitter in 2018! William Mabena het die 100m (o.19-seuns) by die SA’s gewen en ’n tweede plek in die 200m behaal. Abram Kubjane was die SA-kampioen in die 800m vir seuns o.19.

Benewens die atlete wat op podiums gestaan het, het ons ander atlete vaardighede en ’n groot liefde vir sport en aktief wees aangeleer.

Mev. René Oosthuizen is die organiseerder.

RUGBY

Die Nylies speel kookwaterrugby! Die eerstespan is die trots van die skool en elke junior-rugbyspeler streef daarna om die eerstespan te haal! Ons speel elke jaar verskeie vriendskaplike wedstryde en neem aan die Virsekerbeker-liga deel.

Die seuns speel met trots en geniet die spel. Dit is duidelik sigbaar op die veld.

Hoërskool Nylstroom se tweedespan het in 2019 die Limpopo-finaal gewen. Van die Nylies se spelers het die geleentheid gekry om in spanne soos die Noordvaalspan en Akademiespan te speel. Hanno van Biljon is in 2019 vir die Blou Bulle-jeugspan gekies. Die skool is natuurlik ook baie trots op Blou Bulspeler Arno Botha wat hier op ons eie velde sy rugbytande geslyp het!

Mnr. Anton du Plessis, die skoolhoof, is ondervoorsitter van die Limpopo Hoërskole Rugbyvereniging se bestuur.

Mnr. Wollie Booysen is die rugby-organiseerder.

GHOLF

Die Nylies is entoesiastiese gholfspelers en lewer elke jaar uitstekende gholfspanne op. Die spelers sluit teen ’n baie billike tarief by die Koro Creek-gholfklub aan. Dit gee hulle die geleentheid om elke dag van die week op ’n uitmuntende baan te kan speel. Die gholfspelers neem jaarliks aan die Limpopoliga deel waar hulle op vyf verskillende gholfbane in Limpopo speel. Die Waterbergstreek se gholf-interhoër word in 2021 by die Koro Creek-gholflandgoed gehou en dit beloof om ’n suksesvolle dag met goeie gholf te wees.

Hoërskool Nylstroom se gholfspelers toer elke jaar na ’n deel van die land sodat die spelers hul vaardighede op verskillende bane kan slyp. Die spelers het in 2020 die geleentheid gekry om op Sun City en Magaliespark se bane te speel. Covid-19 het ongelukkig die res van die toer kortgeknip.

’n Hoogtepunt op die Nylies se kalender is die jaarlikse Nylie-gholfdag wat ons by die Koro Creek-gholfbaan aanbied. Spelers van nabygeleë dorpe kom geniet ’n heerlike dag saam met ons op die baan. Hierdie dag is elke jaar ’n uitstekende voorbeeld van hoe die Nylies pret en kompetisie meng sodat almal kan dit geniet.

Mnr. Andrie Cronjé is die gholforganiseerder.

SOKKER

Nylie-sokker is ’n jong sport, maar ons deelnemers is vol gees en entoesiasme.

Die sokker vind in die vierde kwartaal plaas en daar is ’n ope span en ’n junior span. Die spanne neem deel aan die Limpopo-sokkerliga.

Die Modimolle Football Club gaan ook betrokke raak by die afrigting van hierdie sport en die Nylies vaardighede leer om hulle ’n voordeel op die sokkerveld te gee.

Ons oefen en ding mee met spangees en ’n sterk band tussen spelers en afrigter!

Mnr. Jurie Human is die organiseerder.

SWEM

Swem is ’n jong sport by die Nylies en dit word met groot entoesiasme aangepak!

Dit vind in die derde en vierde kwartale plaas by die Abraham Krielkinderhuis se swembad. Diegene wat verder deurdring oefen ook in die eerste kwartaal.

Die afrigting is van ’n hoë standaard en word behartig deur twee onderwysers. Me. Murhelda Lourens was ’n SA’s swemmer in vlinderslag en vryslag en mnr. Jacques Janse van Rensburg het as professionele swemmer nasionaal en internasionaal deelgeneem aan die 400m en 200m vryslag.

Me. Murhelda Lourens is die organiseerder.

NETBAL

Hoërskool Nylstroom se netbalspelers speel hul harte uit as hulle voet op die baan sit.

Vanjaar spog die skool met splinternuwe netbalbane en die spelers kan nie wag vir hul eerste wedstryde nie. Die spelers neem jaarliks aan ’n verskeidenheid vriendskaplike en ligawedstryde deel. Vyf van die Nylie-afrigters is provinsiale skeidsregters.

In Desember 2020 het leerders, oud-leerders en onderwysers deelgeneem aan die SA-netbalkampioenskappe.

Stefny-ann du Preez, Miko Keulder en Alicia Oberholzer het in die Waterberg o.21-distrikspan gespeel. René Oosthuizen, (onderwyseres) was doel vir die Waterberg-distrik se senior span en Corlia Herbst (onderwyseres) was die span se hulpafrigter.

In 2019 was die o.14-span die distrikwenners gewees met die o.16-, o.17- en eerstespan wat naaswenners in die distrik was. Die o.16-span was vierde in die Limpopo finale.

Die skool neem ook aan die Fast5-netbalreeks deel, waar vyf spelers met aangepaste netbalreëls sake in hierdie blitsvinnige weergawe van netbal teen ander spanne uitspook.

Mev. René Oosthuizen is die organiseerder.

TENNIS

Die Nylies het elke jaar vier seunspanne en twee of drie dogterspanne. Die spanne neem jaarliks deel teen die suidstreekskole om die titel vir eerste, tweede, derde en vierde span in te palm en dit teen die noordstreekskole uit te spook in die finale rondte vir Limpopo.

Anika Holtzhausen was in 2019 sestiende in die ouderdomsgroep vir o.15-dogters tydens die Suid-Afrikaanse kampioenskappe. Nog ’n Nylie-speler, Remo Tjia, het ook aan die byeenkoms deelgeneem.

Mev. Alida van Heerden is die tennis-organiseerder.

HOKKIE

Hokkie is ’n gewilde wintersportsoort by die Nylies en word in die tweede en derde kwartale aangebied. Daar is ’n o.14, o.15, o.16, tweede en eerste span.

Twee van die afrigters, mnr. Jurie Human en me. Christine le Roux, het ervaring as provinsiale skeidsregters. Mnr. Human dien op die Limpopo-hokkieraad se reëls en regulasies-komitee en me. Le Roux op die gebeure-komitee.

Die Nylies speel ook Fast 5-wedstryde in die vierde kwartaal. Dit vind op ’n kleiner baan plaas en daar is sewe spelers in ’n span. Seuns en meisies kan hieraan deelneem. Hulle kies hul eie spanne en neem deel aan ’n rondomtalie waar uitspeelwedstryde gehou word.

Mnr. Jurie Human is die hokkie-organiseerder.

BERGFIETSRY

Vir die avontuurlustiges bied Hoërskool Nylstroom bergfietsry aan. Leerders het hul eie fietse nodig, maar beginners word die basiese tegnieke geleer om enige hindernisse te kan hanteer. Fiksheid is baie belangrik! Deelnemers oefen op die roetes om Bosveldsig, Aardwolf 4×4 en Koro Creek-gholflandgoed.

Hierdie bane bied ’n verskeidenheid hindernisse waar deelnemers blootstelling en ondervinding kan kry oor hoe om terreine soos klippe, water, los sand, gruis en grondpaaie reg te benader. Om fiks te word durf hulle ook die pad Kranskop toe aan.

Deelnemers neem aan Sondela se wedren buite die dorp en die Lindani-wedren buite Vaalwater deel. Van die leerders het al die 94.7-fietsren en die Argus voltooi. Die gevorderde fietsryers neem ook aan die Noon to Moon-nagresies in Sabie deel. Die fietsryers neem in aflosspanne deel aan hierdie uitdagende rit.

Die fietsryers bestaan uit ’n groep entoesiastiese atlete met baie deursettings vermoë! Word deel van die aanhouers!

Mev. Jenny Botha is die organiseerder.

LANDLOOP

Die Nylies se langasems skrik nie vir ’n paar kilometer se swoeg in sweet nie. Inteendeel… hulle verwelkom dit! Die atlete oefen weekliks by die skool en pak die plaaslike 5km-parkrun wat by die Koro Creek-gholflandgoed aangebied word, op Saterdae aan vir bykomende oefening.

Mnr. Adriaan du Plessis is die organiseerder.

SKAAK

Maak jou skuif…

Die Nylies se skaakspelers was vir drie jaar in ’n ry die wenners van die interhoër-skaak. In hierdie tydperk het nege spelers nasionaal deelgeneem.

Die spanne oefen heeljaar maar neem gedurende Junie en Julie aan verskeie toernooie deel.

Mev. Mariaan Kirchner is die skaak-organiseerder.