Kultuur ~ Culture

NYLIE-KULTUUR LÊ ONS NA AAN DIE HART

Nylies glo daaraan om gebalansseerde leerlinge te ontwikkel, daarom bied ons ook kultuur aktiwiteite soos redenaars, debat en toneel, landsdiens en fotografie aan waar leerlinge hulle ook op die manier kan uitleef.

TONEEL

As jy daardie kriewel in jou voel om ’n storie te vertel… sluit aan by die Nylies se toneelgroep!

Elke jaar voer die skool twee toneelstukke op, een in Afrikaans en een in Engels. Die toneelspelers neem ook aan ’n verskeidenheid kunstefeeste deel soos die ATKV-fees en die Waterberg-kunstefees, waar hulle gereeld trots wegstap met A+ en A++ sertifikate. Die toneelgroep begin reeds vroeg in die jaar oefen.

Mev. Finachlie Diederichs en Me. Karla Briel is die organiseerders.

LANDSDIENS

Landsdiens is ’n opvoedkundige jeugbeweging wat die bewaring van die omgewing nastreef. Daar word gefokus op liefde vir die Skepper, jou medemens, die omgewing en arbeid. Die Landsdieners kom een keer ‘n maand bymekaar en die provinsiale kamp vind gewoonlik in Junie/Julie plaas. Op die kamp word van die kinders verkies om die provinsie by ’n nasionale kamp te verteenwoordig. Die Nylies het elke jaar ’n paar leerders wat hul Springbok-toekennings vir Landsdiens kry.

Die Landsdieners neem aan uitreike deel en het in die verlede Huis Talje, ’n tuiste vir gestremde kinders in Bela-Bela, ondersteun en die braksloot opgeruim. Hulle neem ook deel aan ‘n herwinningsprojek.

Mev. Karla Briel is die organiseerder.

REDENAARS EN DEBAT

Die Nylies is definitief nie op die bek geval nie. Elke jaar het ons leerders wat aan die ATKV-redenaars deelneem. Redenaars en debat ontwikkel leerders se selfvertroue en die vermoeë om ‘n standpunt in te neem met ‘n goed nagevorsde argument.

In 2021 was Lesedi Nkgodi tweede in Limpopo en twaalfde nasionaal in die ATKV se redenaarskompetisie in die afdeling vir Afrikaans Addisionele Taal. Pieter van Heerden was sewende in Limpopo in die Huistaal-afdeling.

In 2019 het Lydia Mothapo, ’n matriekleerder, die eerste plek in die landswye ATKV-kompetisie se afdeling vir onvoorbereide toesprake vir eerste addisionele taal opgeraap. Kaiden Barthram, ook ’n matriekleerder, was een van die 25 beste deelnemers in die afdeling vir voorbereide toesprake vir huistaal-leerders.

Die organiseerders vir redenaars en debat is mevv. Finachlie Diederiks en Alida van Heerden.

NYLIENUUS

Die skoolkoerant NylieNuus verskyn een keer ‘n kwartaal. Hier leer die redaksie om hul taal- en storievertelvaardighede te slyp asook hoe om ‘n goeie foto te neem.